वेलफेयरको सहयोगमा विद्यालय भवन १२ कोठे भबन बन्ने

टेस साकेला- खोटाङको साकेला गाउँपालिकाको सरस्वती माध्यमिक विद्यालयमा ब्रिटिश गोर्खा वेलफेयरको सहयोगमा विद्यालय भवन निर्माण हुने भएकोछ । जिल्लाको दशवटा स्थानीय तहमध्ये छनौट भएको साकेला गाउँपालिका-५ को उक्त विद्यालयमा जि.डब्लु.टि नेपालको आर्थिक सहयोगमा १२ कोठे पक्की भवन निर्माण हुने गरि सम्झौता भईसकेकोछ । कूल २ करोड ८५ लाख ५८ हजार १३३ रुपैंयामा निर्माण सम्पन्न हुने उक्त विद्यालय भवनमा समुदायको २८ लाख १५ हजार ९७३ रुपैंया जनश्रमदान जोडिनेछ ।
यहि कार्तिक २५ गतेदेखि निर्माण सुरु हुने विद्यालयको नयाँ भवन आगामी २०८२ असार १४ गते सम्पन्न हुने लक्ष्य राखिएको छ । विद्यालयको पूर्वतर्फ रहेको लामो पुरानो विद्यालय भवन र सो अगाडिको दुई कोठे भवन भत्काएर उपलब्ध हुने ठाउँमा नयाँ भवन निर्माण गरिने सो विद्यालयका प्रधानाध्यापक शितल राईले बताउनुभयो । नयाँ विद्यालय भवन सँगै पुरानो भवनहरुको मर्मत सँगै ६ कोठे अपाङ्ग र महिलामैत्री शौचालयको समेत निर्माण हुने प्रअ राईले जानकारी दिनुभयो ।
उक्त आयोजना अन्तर्गत ६० जोर डेक्सबेञ्च, फोहोरमैला व्यवस्थापन गर्ने ठाउँ, पीउने पानीको धारा, खानेपानीको ट्याङ्कि लगायतको काम समेत सम्पन्न हुने बताईएको छ । जीडब्लुटी नेपाल र विद्यालयबीच हालै भएको सम्झौता पत्रमा विद्यालयको तर्फबाट विद्यालय व्यवस्थापन समिति अध्यक्ष रमेश राई, प्रधानाध्यापक शितल राई र कार्यवाहक वडाअध्यक्ष निर्मला राईले हस्ताक्षर गर्नुभएको छ भने एरिया वेल्फेयर दिक्तेलको तर्फबाट अफिसर भूमिराज निङलेखु लिम्बु र प्रोजेक्ट सेलको प्रतिनिधि जीवन गुरुङले हस्ताक्षर गर्नुभएको छ ।
व्यवस्थित, सुविधायुक्त र पर्याप्त कक्षाकोठा र भवनको अभाव भईरहेको अवस्थामा ब्रिटिश गोर्खा वेलफेयरबाट प्राप्त अनुदान सहयोगबाट विद्यालयको भवन निर्माण हुनु अत्यन्तै गौरव महशुष गरेको गाउँपालिका अध्यक्ष रवि प्रकाश राईले बताउनुभयो । दुई सय वर्षभन्दा पुरानो इतिहास बोकेको ब्रिटिश गोर्खामा आफूले समेत रगत र पसिना बगाएको उल्लेख गर्नुहुँदै अध्यक्ष राईले आफू निर्वाचित भएको ठाउँमा ब्रिटिश गोर्खा वेलफेयरबाट विद्यालय निर्माणको लागि अनुदान पाउनु निकै महत्वको विषय भएको उल्लेख गर्नुभयो ।२०८१ असोज १५ गते ।