गढीमा चैतेधानमा बृद्धी

उदयपुरगढी गाउँपालिकामा चैते धानको खेती विस्तार हुँदै गएको छ ।

विगतमा सीमित क्षेत्रमा सीमित मात्रामा लगाइने चैते धान अहिले तल्लो भेगका अधिकांश खेतमा फैलिएको छ ।

कृषकहरूका अनुसार पालिकाको कृषि विकास शाखाले सिँचाइका लागि कुलो निर्माण, उन्नत बीउ, मल र कृषि उपकरण उपलब्ध गराएपछि खेती विस्तारमा टेवा पुगेको हो । कृषक हरीबहादुर कार्कीका अनुसार तावा खोला क्षेत्रमा पहिले थोरै मात्रामा लगाइने चैते धान अहिले अधिकांश खेतमा लगाउन थालिएको छ ।

गाउँपालिकाका विभिन्न वडामा चैते धान खेती हुँदै आएको र करिब १०० हेक्टर क्षेत्रफलमा उत्पादन हुने कृषि शाखा प्रमुख पारसमणी फुयलले जानकारी दिए। अनुगमनका क्रममा कृषि ज्ञान केन्द्र उदयपुरका सूचना अधिकारी अनु बि.सी.ले सिँचाइ सुविधामा थप लगानी गर्न सके क्षेत्र अझै बढ्न सक्ने बताए । उनका अनुसार धान खेतीलाई आधुनिकीकरण गर्ने प्रयाससँगै कृषकहरू आत्मनिर्भर र प्रोत्साहित हुँदै गएका छन् ।